تعرف تنزل ويندوز؟

اول الافكار الجديدة اللى هتكلم عنها صيانة الكمبيوتر لانه وببساطة تخصصى هارد وير وهو المفضل لدى وسوفت وير وهو المتميز فيه عن الهاردوير

طيب واحنا مالنا يعنى

انا بفكر معاكم فى طرق للبحث عن شغل محترم يقضى على البطالة ويساهم فى الرقى طيب ايه حكاية الويندوز .

انت بتقرا رسالتى دى يعنى انت عندك خط نت ويبقى بالأولى عندك كمبيوتر يبقى انت على اتصال :-d طيب جهازك لما بيعطل ويحتاج ويندوز مثلا بتعمل صيانته انت ولا بتروح بيه لشركة كمبيوتر؟

بتعمل صيانته انت يبقى انت المقصود طيب بتروح لشركة كمبيوتر يبقى انت المقصود برضو.

اتعلم تنزيل الويندوز طبعا سهلة دى كل الدنيا شرحتها المنتديات العربية كلها تقريبا شارحة تنزيل كل نسخ الويندوز من اول 95 لغاية الفيستا ومرورا بالسفن برضو اتعلم انت اكس بى وفيستا لانهم اللى متوافرين حاليا ومطلوبين وخصوصا ويندوز اكس بى .

طيب اتعلمنا بقينا بتوع صيانة كدة؟ 

لا طبعا تابع المنتديات وجديد البرامج والشروحات كمان اتعلم اشياء ولو مبدئية فى الهارد وير مثلا زى صفارة الرامة وصفارة كرت الشاشة – ان وجد- وصفارة السيموس وغيره

كمان اسباب عطل الجهاز البسيطة زى مروحة البروسيسور وكابل الداتا وشوية كمان كدة تتدرج وتعرف مثلا المكثفات البايظة وشوية كمان تعرف دواير المازر بورد وهكذا لغاية ماما تبقى راجل آى تى محترف

بس انت ابدأ بالسوفت وير يعنى الويندوز والفيروسات وتنضيفها وكمان تقسيم الهارد وحاجات زى كدة

كمان اتعلم تجميع الجهاز لو طلب منك عميل تجميع جهاز مواصفات معينة روح اتفق مع شركة كمبيوتر-يستحسن تكون شركات-   انك هتكون عميل معاهم عشان تكون اسعارك غير اسعار الزبون العادى

ابتدى الموضوع مع الجيران والاهل والاصحاب وهكذا فى البداية مش مشكلة انت تكسب كتير او مش مشكلة انك تكسب اصلا لكن الاهم انك تتعلم بس اوعى تعمل فتك وتخرب اجهزة الناس انا بقول اهه عشان ما تقولش عنى انى انا اللى قولت كدة

بس قبل ما تعمل حاجة اقرا كويس عنها حاول ان يكون شغلك شرعى هو فى شغل شرعى وعرفى؟ ايوة يعنى بلاش من نسخ الويندوز المضروبة حاول تشترى نسخة وكمان تحاول انك تشتغل مع ناس معاها ليسنس (نسخة مرخصة) يكون افضل رغم انه نادر انك تلاقى ناس معاهم نسختهم وكمان الاوفيس والبرامج وغيرها ياريت تكون مترخصة طلبا للبركة من الله عز وجل

فى المستقبل بقا ابقى وسع من معرفتك يعنى صيانة هاردات على شوية طابعات الاينك جيت والليزر وهكذا وبرضو اقرا عن الشبكات وطريقة عمل كابلات الشبكة وبرضو دى من الاشياء السهلة جدا جدا وفيها شغل مطلوب كتير يعنى الربط البسيط للشبكة مش محتاج معرفة كتير لاكن اوعى تسكت عند حد معين لازم تطور نفسك باستمرار

منتظر ردودكم

continue reading

عاوز تشتغل ايه؟

كل واحد فينا نفسه فى شغلانة معينة اللى نفسه يبقى دكتور واللى نفسه يبقى طيار واللى نفسه يبقى حتى وزير كل واحد من دول يا اما حقق امنيته او لسه ما اتحققتش او مش هتتحقق اصلا ليه؟

الاول عمل المفروض عليه وكمان الظروف كانت مساعداه للوصول للى هو عاوزه واخيرا لقى دعم ومناخ وصله للى هو عاوزه

التانى عمل المطلوب ولكن وقف شئ فى طريقه يا اما الظروف يا اما هو كسل بعد ما ابتدى مجتهد يا اما الدنيا وقفت ضده

يعنى مثلا واحد عاوز يبقى دكتور ذاكر كويس فى الثانوية لغاية ما دخل طب بعد ما دخل طب ما بقاش يذاكر ولا يحضر ولا يهتم طبعا نتيجة طبيعية سقط فى الامتحانات كذا مرة وفى الاخر تم فصله من الكلية

او برضو ذاكر فى الثانوية ودخل الكلية وكان مجتهد ولكن شاء ربنا انه تنقطع عنه الفلوس سواء بوفاة الوالد مثلا او افلاس مشروعه – على اعتبار انه عنده مشروع- احنا بنقول مثلا

وممكن برضو ما حصلش كل ده صاحنا ذاكر فى الثانوية وكان ممتاز فى الكية وجه دكتور ابن لذين فى سنة من السنين حط صاحنا فى دماغه سقطه سنتين تلاتة كره الكلية وسابها ووالله انا اعرف واحد عنده حوالى 55 سنة دلوقتى كان فى هندسة وحصل معاه كدة والراجل ده من الصعيد يعنى الهندسة دى كانت اختراع جديد ايامه تخيلوا انه ما اتجوزش حتى لغاية يومنا ده؟

التالت بقى ده بيستهبل لا تعب روحه فى ثانوية ولا اصلا قدر يدخل الثانوية طيب ازاى هيبقى دكتور اذا كان انضف اصدقائه على رأى العظيم اللمبى (على علوكّة وأشرف كوخة) يبقى عاوزه ازاى يطلع طيار؟ نعم العقل ونعم المنطق من اللمبى

طيب لغاية كدة شوفنا الناس من البداية يعنى واحد كان هدفه من صغره وحاول يحق الهدف ده وقولنا انه 3 احتمالات زى مانا شايف طيب انا استجد قدامى هدف بعد ما كبرت مثلا

برضو الهدف ده ممكن يكون مستحيل التحقيق او على الاقل صعب التحقيق وممكن يكون قابل للتحقيق نضرب امثله:

واحد نفسه يكون دكتور وهو عنده 43 سنة !!! يعمل ايه هيقول هذاكر ثانوية وادخل طب نقوله ذاكر على راحتك لكن مالكش طب ازاى ؟ الكليات فى مجملها ليها قوانين والكليات العملية خصوصا من شروطها السن يعنى مثلا هندسة مش هتقبلك اكتر من 28 سنة مهما كان مجموعك يا رب تكون احسن من اقليدس فى الرياضة ومن ايفيل فى الهندسة يبقى ده بيحلم فى الهوا هيتعب ومش هياخد اى حاجة!!!

رغم ان الدنيا بدات تتحسن بالتعليم المفتوح اللى يتقل جيبه يبقى طيار (كدة كلام اللمى بقى فى الهوا)

طيب واحد نفسه يشتغل على عربية كبدة!! يا سلام يبقى نقوله ذاكر ثانوية وادخل معهد كبدة ام حسن هتتعلم هناك اساس الساندوتش والطبات ومن هناك هتطلع معاك شهادة الكبدة وتبقى اى عربية ترحب بيك وانت حاطط رجل على رجل

سامع واحد بيقول اشمعنا ؟ اقوله انا انت راجل بتاع كبدة اينعم لكن بتاع مدارس يعنى متنورررر مش اى حد غير بتاع الكبدة اللى لا راح المعهد العالى للكبدة ولا كان معاه مسطرة حرف كى ((مشتقة من كبدة))

يبقلا الواحد دلوقتى فهم ان مش كل الاهداف المستجدة ممكن تحقيقها

واحد تانى مثلا حب يدخل شرطة بعد المعاش مش عارف اقوله ايه ده اصلى بكتب الكلام ده وانا صايم اصلنا فى رمضان

استغفر الله العظيم

اشوفكم المرة الجاية ان شاء الله

continue reading